Nën moton e martirëve të popullit tonë dhe kishës sonë, dje në Emmenbrücke, më 24 nëntor 2024, kremtuam me solemnitet të madh festën e Krishtit Mbret dhe festën e flamurit tonë kombëtar.
Kremtimi i meshës nisi me një procesion solemn të mbushur me fëmijë dhe të rinj të veshur me veshje kombëtare, të cilët, nën tingujt e muzikës dhe këngëve të kënduara me aq profesionalizëm nga kori ynë, iu afruan altarit të shenjtë, i rrethuar nga figurat e martirëve, shenjtërve dhe simboleve tona kombëtare, të cilat prisnin që ne të afrohemi në emër të Atit, të Birit dhe të Shpirtit të Shenjtë dhe kështu të lavdërojmë dhe bekojmë Zotin.
Kisha ishte e mbushur plot me besimtarë, miq dhe përkrahës, të cilët erdhën për t’u lutur së bashku dhe për të falënderuar Zotin për të gjitha të mirat që kemi në jetën tonë, në familje, në kishë dhe në popull.
Kjo meshë u drejtua nga Don Lush Gjergji, një prift i dashur dhe i respektuar nga të gjithë. Në predikimin e këtij rasti, Don Lushi foli për të gjitha ato vlera shpirtërore dhe kulturore që jemi thirrur t’i ruajmë dhe kultivojmë. Don Lushi po ashtu shprehu falënderimet dhe mirënjohjen e tij për këtë festë kaq madhështore dhe kaq të mbushur me vlera fetare dhe kombëtare.
Gjatë meshës u bë edhe pagëzimi i një vajze të re, e cila, pas përgatitjes fetare dhe shpirtërore, pranoi sakramentet e fillimit të jetës së krishterë.
Në këtë festë mori pjesë edhe miku ynë Valon Islamaj, i cili së bashku me gruan e tij kishte ardhur për të festuar me ne, duke na dhuruar dy këngë shumë të bukura që ngjallën tek të gjithë ata të pranishëm emocione mirënjohjeje dhe krenarie për atë që jemi dhe kemi si popull i lashtë i Evropës.
Për të gjitha këto falënderojmë Zotin, bashkëpunëtorët tanë të shumtë, miqtë dhe dashamirët tanë që na mbështesin në misionin tonë të shenjtë në shërbim të Kishës dhe të popullit.
Zoti e bekoftë Misionin tonë!
Foto: Nue Tuqi & Martin Musaj
