Përveç grupit të këshilltarëve, të anëtarëve të korit, të forumit të nënave, të të rinjve, të ministrantave, Misioni ynë ka edhe grupin e lexuesve që përbëhet nga më shumë se 50-të persona. Duke pasur parasysh përgjegjësinë dhe përgatitjen shpirtërore që duhet ta ketë çdo lexues, dje, me 16 maj, Misioni ynë ka organizuar një ripërtëritje shpirtërore për grupin e lexuesve. Qëllimi i takimit ishte përgatitja shpirtërore dhe vetëdijesimi për detyrën (shërbesën) shumë të çmuar të lexuesit në kremtime liturgjike. Tema e takimit ishte: Jezusin e përbuzin në Nazaret (Lk 4, 16-30). Përmes leximit dhe meditimit të kësaj pjese biblike, patëm mundësi të kuptojmë më mirë shërbesën e lexuesit dhe njëkohësisht të pasurohemi shpirtërisht me Fjalën e Zotit. Pas meditimit na u dha mundësi e bashkë-ndarjes së përvojës me leximin dhe meditimin e Fjalës së Hyjit. Pas meditimit patëm Meshën shenjte; ndërsa, pas Meshe ishte përgatitur një ndeje e përbashkët ku patëm mundësi të shkëmbejmë fjalë, mendime dhe të njoftohemi më shumë, sidomos me lexuesit e rinj. Urojmë dhe dëshirojmë që Fjala e Zotit të jetë dritë për hapat apo vendimet tona.
